सासु नेपाल प्रतियोगिता

जवानीले भरिएका बीस बाईस बर्षे कन्याहरुको क्याटवाक्, लचकता, नाङ्खा अङ्ग हेरेर विगतमा मिस नेपाल घोषणा गरिन्थ्यो । तर महिला अधिकारकर्मीहरुका रिसका कारण मिस नेपाल प्रतियोगिता नै ठिस भएको बेला अर्को तिर हाम्रो टोलमा भने सासु नेपाल प्रतियोगिताको सुरुवात भएको छ । ५०-५५ बर्षभन्दा माथिका देखि मृत्यु नजिकै पुगेकाहरु सम्म जोसँग बुहारीको जगल्टा केलाउन सक्ने तागत छ उनीहरु यसका प्रर्तिपर्धी रहनेछन् । हिजो माथ्ला घरकी सानुकान्छी भन्दै थिई–“हेर्नुस न दाजु, अस्ति भर्खर मात्रै ब्वाईफ्रेन्डले नयाँ कुर्था सुरुवाल गिफ्ट दिएको थियो । हजुरआमाले जबरजस्ती लगाएर धुजैधुजा पार्नुभएछ । कत्तिन नातिनिको लुगा लगाएर सासु नेपालको ताज लगाउन खोज्या होला” मैले सुने मात्र अनि फिस्स हास्दै एउटा गणतान्त्रिक उखान सम्झे – “नातिनीको कुर्थासुरुवालमा हजुरआमाको रजाई” । बुझ्दा हाम्रो टोल भरिनै यसको रौनक त खहरेमा साउनको भेल झै पो उर्लदै रहेछ ।
घर पुगें । घरमा त दन्तवजान । औसीको रातझै हजुरआमाको मुख एकातिर आमाको अर्कोतिर । कपाल पनि लुछालुछ छ ।कुरो के रहेछ भने हाम्री हजुरआमा पनि सासु नेपाल प्रतियोगितामा भिड्दै हुनुहुँदो रहेछ । जसले आफ्नी बुहारीलाई युद्धमा हराउन सक्छ, आफ्नो नियन्त्रणमा लिन सक्छ, उ पहिलो छनौंट राउण्डमा पर्ने रहेछ । त्यसपछि अर्को राउण्डमा पहिरण, सिंगारपटार, क्याटवाक, मुस्कान जस्ता कुरामा प्रतिस्पर्धा रहेछ । धन्न घरमा चाढैं बुवा पुगेर छुट्याइदिनुभएछ र केही अरु हुन पाएन । म त के भन्ने भन्ने दोधारमा पो परें । न आमाको पक्ष लिनु न हजुरआमाको । अब कसले जित्नुभयो भनेर पनि कसरी सोध्नु । केही नभनी फुत्त बाहिर निस्कें । छिमेकतिर पनि हेर्छु त त्यस्तै छ । कसैको घरमा सासु घाइते त कसैकोमा बुहारी घाइते । कोही युवती मिनिस्कट हरायो भनेर रोइरहेका त कोही क्रिम पाउडर हजुरआमाले एकै दिनमा लगाएर सिध्याएको भन्दै वाउसँग पैसा मागीरहेका । कँही त डाडु पन्यू नै हालाहाल ।
बावै नि त ! यो सासु नेपालको उद्गम थलो हुन लागेको हाम्रो टोल त यस्तो भैसक्यो भने यो नेपाल भरी फैलिदा झन कस्तो होला ? मेरो त आङनै सिरिङ्ग ग¥यो । अर्को कुरा मलाई त विहे गर्नपनि डर पो लाग्न थाल्यो । भोली मेरी जुनुलाई मैले विहे गरेपछि आमालाई पनि त सासु नेपाल हुन रहर लाग्ला । आमाको रहर भाँच्ने छोरो पनि कसरी हुनु र मेरी जुनुले पन्यूको झटारो खाएको पनि कसरी हेर्नु । मेरी गर्लफ्रेन्ड मलाई विहे गर्न खाली कर कर गरी रहन्छे । हेनुस् मैले त अव विहे नै गर्ने निधो गरें । मत भोली नै मेरी गर्लफ्रेन्डलाई भेटेर यहि भनिदिन्छु । जय होस सासु नेपाल प्रतियोगिताको ।