गाउदिन म नारा

गाउदिन म नारा अब छोडें हजुरलाई
सायद मैले बित्थैममा हात जोडें हजुरलाई


गरें गल्ति आश्वासनको दगुरेर पछि पछि
आफनो भाग्य आफनै हाातले फोडें हजुरलाई

सयौ सयौ आन्दोलनमा लडी भोक भोकै
सडकबाट महलसम्म मोडें हजुरलाई ।


फुल्नुभो फल्नुभो तर उस्तै नै छ देश
बेकारमा झण्डा बोकी गोडें हजुरलाई ।


जबदेखि सिदान्तलाई बनाउनुभो लगौटीनै
रोजिसकें बाटो नया तोड़ें हजुरलाई ।
२०६४ मंगसिर १८
काठमांडू

गुड्ने घर - जर्मनदेखि नेपालसम्म

२०६७ जेठ ०९ गते राजधानी दैनिकमा प्रकाशित

राजनीति

कुकुर र बिरालोको रति चल्छ राजनीतिमा
जनता चुस्ने जाली खेल कति चल्छ राजनीतिमा

खरायोको बेगमा सधै भष्ट्र तस्कर माथि माथि
बिकासमा त कछुवाकै गति चल्छ राजनीतिमा

विदेशीको एजेन्ट नेता सुन्दैन हौ जनतालाई
त्यसैले त देश उधोमति चल्छ राजनीतिमा

बन्दुक बम ईटा टायर लाठी मुङग्री सबैथोक
कुर्सी टेक्ने उपाय जे छ जति चल्छ राजनीतिमा

हेर, लुट्दै हाम्रा पसिना त्यहाँ सधै नाङ्गो नाच
बर्षैभरी गाईजात्रा अति चल्छ राजनीतिमा

बिरोध

लुटिनेलाई अझ उल्टै चोर बिरोध गर्छ
थोरै भयो सामान भन्दै घोर बिरोध गर्छ

जब आँउछ उत्तरमा नयाँ घामको लाली
अँध्यारोकै पक्ष लिई भोर बिरोध गर्छ

कुटिनेलाई ऐन कानुन कुट्नेलाई चैन
फटाहालाई भित्र थुने खोर बिरोध गर्छ

कुच्चो लिई यो ब्यबस्था बर्ढानु छ अब
सफा होलाकी डराएर फोहोर बिरोध गर्छ ।

–२०६६ चैत्र २२
ललितपुर

सालिक

पृथ्वीमा हरेक बिहान घाम उदाँउछ
र फर्कन्छ साँझमा लाजले रात्ताम्मे भएर
किनकी बन्दैन कहिल्यै सालिक यहाँ
भोकमरीले पल पल पिल्सिएर
लगौटीको पासो लगाएर आत्महत्या गर्नेहरुको

यद्यपि
लुट्यो जसले जिबनभर गाँस बास र आस उसको
सत्ताको वरीपिरी साँढेझै घुमेर
त्यो शिखरपुरुष हुन्छ
त्यो महाँनायक हुन्छ
र त्यसको शिखर जत्रो सालिक बन्छ
कम्तिमा एकपटक भएपनि
मुस्कुराउछ घाम निसंकोच
जब हग्छ कागले तिनका सालिक माथि ।

–२०६६ चैत्र २२
ललितपुर

नया पार्टी

संसारका महान प्रेमी–प्रेमीकाहरु एक जुट हौं ।












नेपाल लभनिष्ट पार्टी (मैयावादी)
केन्द्रीय समिति
प्रेमनगर, काठमाण्डौं ।

आदरणिय मुत्तिकामी प्रेमीप्रेमीकाहरु,
हाम्रो महान तथा गौरबशाली पाटी नेपाल लभनिष्ट पाटी(मैयाबादी) ले सम्पूर्ण शोषित पीडित प्रेमजोडीहरुको हक र अधिकारको आवाज सयौं दिनदेखि उठाउदै आईरहेको कुरा यहाँहरु सबैलाई बिदितै छ। संसारमा रहेका के ढुकुर के कुकुर के मान्छे सम्पूर्ण प्राणिहरु प्रेमबिना एक सेकेन्ड पनि बाँच्न सक्दैनन्। अझ त्यसमा पनि कुखुरे बैंसमा केटाको दिलको धड्कन र कोमलाङी मैयाको दिलको धड्कन एक आपसमा मिल्न पाएन भने त संसारनै बिस्फोट हुन्छ।
जब संसारमा लभको बिकास भयो तब त्यहाँ अबरोधको पनि झन बिकास भयो। लभ र अबरोधको जब द्धन्द हुन्छ तब त्यहाँ लभको नै जित हुन्छ । यो हाम्रो पाटीको दर्शन हो । हाम्रो सिदान्त –संसारमा लभमा हुने सबैखाले अबरोधहरुको बिनास हुनुपर्छ र लभको बिकास हुनुपर्छ भन्ने रहेको छ । लभमा उत्पन्न हुने प्रतिगामी अबरोध चिर्न अब नेपालबाट एउटा लभ आन्दोलन जरुरी छ जुन आन्दोलनले प्रेम गर्दा गर्दै धोका दिने,वा बिवाह गर्न अबरोध सिर्जना गर्ने, सार्बजनिक ठाँउमा अंगालो हालेर टङ किस गर्न नदिने जस्ता तत्वहरुलाई ठूलो धक्का दिएर छक्का बनाईदिने पक्का छ ।
मुत्तिकामी प्रेमजोडीहरु, साँच्चै लभको आँखा अन्धो हुन्छ तर लभमा अबरोध सिर्जना गर्न बाउआमाहरुका आँखा भने एकदमै तेज हुन्छ । जसले गर्दा हामीहरुले ठूलो मानसिक तनाब खेपिरहनु परिरहेको छौ। अर्कातिर गाँठवाला र दह्रो मालवाला पाएपछी केटालाई धोका दिएर बोका बनाइदिने केटीहरु पनी छन्। त्यस्तै च्वाँक–च्वाँक अरु केटीहरु भेटेपछि एकछिन् अघि गाला चाटेकी मैंयालाई आँखा तर्ने र छोड्ने केटाहरु पनि छन्। यसप्रकारका महाँ पापिष्टहरुलाई कार्बाही गर्ने न नियम छ न त कानुन नै । उनीहरुलाई सजाय दिन राज्यमा प्रेम कानुनको व्यबस्था हाम्रो प्रमूख माग हो । सार्बजनिक ठाँउमा एक अर्कालाई घण्टौंसम्म किस गर्न नपाउदा मुडनै ठिस भएर कति प्रेमीप्रेमीकाहरु पीडित भएका छन्। सार्बजनिक ठाँउमा रोमान्स गर्ने अधिकार स्थापना गर्नु हाम्रो महान उदेश्य हो । वर्तमान राज्यव्यबस्था हामी प्रेमीप्रेमीकाको बिरुद्धमा रहेकाले त्यसतर्फ बुलन्द आवाज उठाउनु आबश्यक भईसकेकोले हामी छिट्टै आन्दोलनको तयारीमा छौं । हम्रो आन्दोलन अरुको जस्तो सडकमा टायर बालेर हैन युगल जोडी अंगालोमा बाँधिदै , चुप्पा खाँदै , कहिले चिमोट्दै ,कहिले मुस्कुराँउदै सडकमा नारा घन्काउदै शान्तिपुर्ण रुपमा हुनेछ। हाम्रो आन्दोलनका प्रमुख मागहरु यसप्रकार रहेका छन्–
· प्रेम अधिकारको सुनिश्चतताको लागि संबिधान सभामा कम्तिमा दुईजोडी प्रेमीप्रेमीकालाइ सभासद माँ नियुत्त गर् ।
· स्कुल कलेजमा लभ सम्बन्धि पाठ्यक्रम लागू गर् ।साथै लभ युनिभरसिटीको व्यबस्था गर् ।
· नेपालको राष्टिय चाड दशैं तिहार नभएर भ्यालेन्टाईन डे लाई घोषणा गर् ।
· सार्बजनिक ठाँउहरुमा लभ गर्न पार्कहरुको निर्माण तत्काल गर् ।
· पे्रमीप्रेमीकाहरुको लागि प्रेम कार्डको बितरण गरेर यातायातका साधनहरु एवं हस्पीटल र पार्कमा ४५ प्रतिशत डिस्काउन्टको व्यबस्था गर ।
· यदि प्रेमिका गर्भवती भए निःशुल्क एर्भसनको व्यबस्था गर् ।
· धोकेबाजहरुलाई कार्बाही गर्न लभ अदालतको व्यबस्था गर् ।
· प्रेमी प्रेमिकाको यौन स्वास्थ्य सुरक्षित राख्न प्रत्येक पसल–पसलमा निःशुल्क कण्डम वितरणको व्यबस्था गर् ।
हम्रा यि अत्यन्त जायज मागहरुलाई सरकारले तत्काल सम्बोधन नगरे हामी चुप लागेर बस्नेवाला छैनौं । हम्रो शान्तिपुर्ण आन्दोलन चरणगतरुपमा एक अर्काको गालामा चुप्पा खाँदै अघि बढ्दै जाने छ। त्यसको लागि तपाई जोडिहरु अंगालोमा बाँधिएर सकेसम्म छोटा र टाईट कपडामा लास्टै सेक्सी देखिने गरी निम्न स्थानहरुमा भेला भैदिन हार्दिक अपिल गर्दछौं।
आन्दोलन शुरु हुने स्थानाहरुहः भृकुटीमण्डप, बालाजु पार्क, गोदावरी र रत्नपार्क ।
समयः बिहान भाले बासेदेखि बेलुका पोथि कर्कराउने बेलासम्म ।

लभ आन्दोलन सफल पारऔं
अबरोधवादलाई तुरुन्तै मारौं ।

कामुकराज चुप्पानाथ
अध्यक्ष एवं सर्वोच्च कमान्डर
नेपाल लभनिष्ट पार्टी (मैंयावादी)
केन्द्रीय समिति

नोट -आजाद अजनवी द्वारा लिखित
कामना 2066 मा नेत्रंमणि राइ को नाममाँ प्रकाशित

गीर्जाउ ! अधुरै रह्यो क्यारीकेचर सुनाउने धोको

पुर्वस्मृति संगै अगाडि बढ्दैछु । स्कुल पढ्ने केटौले जिन्दगी हाहा–हुहु गर्दै दिन कटाउने उमेरमा नमिले पनि गिरिजाप्रसाद कोईरालाको नक्कल गरिन्थ्यो साथीसंग । हरेक वर्ष गाईजात्रामा निक्लने हाँस्यव्यङ्ग्यका एक, दुईवटा रिलवाला क्यासेटहरु गाँउमा पुग्थे । त्यी बाह्रै महिना गाँउ नै थर्किने गरी ठुलो स्वरमा घन्कन्थे । तिनै रिलवाला चक्कामध्ये कुनैमा डुप्लिकेट गिरिजाप्रसाद पनि बोल्थ्यो । अनि त्यहि डुप्लिकेट कोईरालाको पनि बोली नक्कल गर्न मन लाग्थ्यो । थाहा थिएन त्यो कस्तो मान्छे हो गिरिजाप्रसाद कोईरालो ? स्कुल सकेपछी लागियो क्याम्पसतिर २०६० सालदेखि । बास्तबिक कोईरालाको स्वर अलि अलि सुनेपनि डुप्लिकेट कोईरालाको आवाज नक्कल गर्दा पनि केही मात्रामा मिल्ने भएछ । अनि त क्याम्पसतिर हुने साँस्कृतिक एवं बिद्यार्थी संगठनका कार्यक्रमको स्टेजतिर साथीहरुले धकेल्न थालीहाले । अभ्यास पनि खुब गर्न थालियो कोठाको झ्याल ढोका थुनेर ऐना हेर्दै– “म के भन्दचु भने भन्दचु की नेपोली कंग्रेच...”
बल्ल बल्ल क्यारीकेचरमा निखारता आएपछी एउटा रहर पलाएथ्यो, कुनै दिन कुनै स्टेजमा गिरिजाप्रसादकै अगाडि उनकै नक्कल गरेर देखाउने । तर गीर्जाउ ! अधुरै रह्यो क्यारीकेचर सुनाउने धोको । नेपाली राजनीतिमा जे जति राम्रा नराम्रा कार्य गरेपनि मेरो हार्दिक श्रद्धाञ्जली ।
–२०६६ चैत्र ७
ललितपुर ।

के भर

–आजाद अजनवी


के भर पानी खर झै सल्किन सक्छ
अनि आगो नदी झै छल्किन सक्छ ।

जे पनि हुन्छ प्रेममा धनसम्पति भए
गाई पनि बोका संग पल्किन सक्छ ।

सत्ताका रत्तपिपासु जल्हादहरु पनि
कहिलेकाँही आफुलाई बुद्द कल्पिन सक्छ ।

अँध्यारो या उज्यालो उत्तिकै छ आतंक
अब दिन पनि राततिर ढल्किन सक्छ ।

“सतिले सरापेको देशमा के के हुन्छ के के”
ध्वाँसो पनि जुनझै टल्किन सक्छ ।

कैयौ शिखर सयौं जंघार

+कैयौ शिखर सयौं जंघार काट्रनै गाह्रो भो
–बाधाहरु पन्छाई मायाँ साट्नै गाह्रो भो

आकासको एउटा जुन हामी दुईलाइ देख्छ
एउटा आँखा त्यता पोख्छ अर्को यता पौख्छ
त्यै जुनलाई खबर भने मलाइ भन्ला की
तिम्रो मेरो मायाको पुल त्यहि बन्ला की

+कैयौ शिखर सयौं जंघार काट्रनै गाह्रो भो


जस्ले जति रोकुन तिमीलाई माया नरौकियोस
जहाँ तिमीलाई थुने पनि माया नथुनियोस
हावालाई यही खबर पठाएकौ छु है
पिरै पिरले म पनि त छट्पटिएको छु है ।

–बाधाहरु पन्छाई मायाँ साट्नै गाह्रो भो

–२०६६ पौष २२

झन्डा बोक्ने साथी

भोकै–भोकमा सधै रुन्थ्यो झण्डा बोक्ने साथी
बासी भन्दा साझी सुन्थ्यो झण्डा बोक्ने साथी

चिल्लो गाडी नयाँ कोट आज अर्कै भईसकेछ
मेरो थोत्रो लुगा छुन्थ्यो झण्डा बोक्ने साथी ।

ब्यानरको सिरानी हाल्थ्यो,साँझमै टुप्लिकिन्थ्यो
सुत्त्न पाईन भनिरहन्थ्यो झण्डा बोक्ने साथी ।

क्रान्तिको गफ हाँक्थ्यो आज नोकर दर्जनौं छन्
भाडाबर्तन पनि धुन्थ्यो झण्डा बोक्ने साथी ।

सत्ता मै टेक्यो उसले बिर्सीहाल्यो “अजनवी”लाई
क्यै नहुँदा पो नजिक हुन्थ्यो झण्डा बोक्ने साथी ।

कबी बन्छ मान्छे

धनराज गिरी
















एउटा नसा चढेपछी कबी बन्छ मान्छे
आँफै सँग लढेपछी कबी बन्छ मान्छे

धेरै ग्रन्थ पढिदैमा खासै केही हुन्न
प्रेम ग्रन्थ पढेपछी कबी बन्छ मान्छे

डढेपनी गाउ बस्ती फेरी बन्न सक्छ्न
हिर्दय नै डढेपछी कबी बन्छ मान्छे

तरबारको घाऊ बरु निको हुन सक्छ
बचन काढा गढेपछी कबी बन्छ मान्छे

अचम्मको मनोदशा हुन्छ मानिसमा
अनुराग बढेपछि कबी बन्छ मान्छे .

नेता हजुर

मनपरी छ जनतासंग बोकाजस्तै नेता हजुर
भष्ट्राचारले डम्म भुँडी भोकाजस्तै नेता हजुर

सबैतिर ठिक्क–ठाक्क यसो पनि उसो पनि
झिलिमिली मैंयाको धोका जस्तै नेता हजुर

भुत्ते दिमाग मुढे बलमा माथि पुग्ने दाउ सधै
गोबरमाटो भरीएको पोका जस्तै नेता हजुर

चुनाबमा झुल्कीदिन्छ जितेपछी अस्ताईहाल्छ
पानी पर्दा बलेसीको फोका जस्तै नेता हजुर

सिंहदरबार छिरेपछी थाहैहुन्न गाँउ क्यारे !
पसेपछी निस्कनै नमिल्ने ढोका जस्तै नेता हजुर
·